စစ်ပွဲထဲမှာကျွန်တော်မရှိတော့ဘူး

     

                  (၁)

စစ်ပွဲထဲမှာ ကျွန်တော်မပါတော့ဘူးအမေ
ကျွန်တော့်အတွက် စိတ်ပူနေမှာစိုးလို့
တိုက်ပွဲထဲမှာ  ကျွန်တော်မပါတော့တာ
သုံးလကြာပြီ.....
ကျွန်တော်ဟာ တောတောင်သဘာဝကို ချစ်တယ်
ဒါကြောင့် မြက်ခင်းစိမ်းစိမ်းပေါ်မှာ
ကျွန်တော့်နာမည်ကို ကမ္ပည်းထိုးထားတယ်
ကျွန်တော်က မြက်ခင်းအောက်မှာ အိပ်စက်လို့။

            (၂)

စစ်ပွဲထဲမှာ ကျွန်တော်မပါတော့ဘူး
သွေးညှီနံ့နဲ့ ယမ်းနံ့တွေကို မုန်းလို့
အာဃာတတရားနဲ့ သတ်ဖြတ်မှုကို မနှစ်မြို့လို့
ကျွန်တော့်ခြေထောက်တစ်ဖက်နဲ့
ကျွန်တော့်တစ်ကိုယ်ရေငြိမ်းချမ်းရေးကို
အလဲအထပ်လက်မှတ်ထိုးခဲ့ပြီ

အခုဆို......
ကျွန်တော်ဟာ ချိုင်းထောက်တစ်ဖက်နဲ့
ငြိမ်းငြိမ်းချမ်းချမ်း ဝမ်းစာရှာဖွေနေတယ်
ကျွန်တော့်လက်ထဲက စံပယ်ပန်းလေးတွေ
လေသင့်ရာမွှေးမြပါစေ။

         (၃)

စစ်ပွဲထဲမှာ ကျွန်တော်မရှိတော့ဘူးအမိုး
ကျွန်တော်တို့ တောင်ယာထဲက
တောင်ကျစမ်းရေအေးနဲ့
ကျွန်တော့်တစ်ကိုယ်လုံးမှာ ပေနေတဲ့ သွေးတွေဆေးရင်း
တစ်ရေးလောက် အိပ်နေတယ်
ကျေးငှက်ကလေးတွေ ဆိုတဲ့တေးနဲ့
ကျွန်တော်အေးချမ်းသွားပြီ။
 အဇ္ဇ

(၂၇-၉-၁၉)ရက်နေ့ထုတ် 7 day daily newspaper မှကူးယူဖေါ်ပြသည်။

(photo: Nyein Wai, Poetic photography)