သေမင်းကို အနိုင်ယူခြင်း
ဆေးတက္ကသိုလ်(၂) Annual Magazine
၁၉၇၂ -၇၃
သမားတော်က
ငါ့ဘဝကို
ကုသပေးရန် ကြိုးပမ်းဆဲ။
သေမင်းချောင်းဟန့်
သူရပ်တန့်၍
ခြောက်လှန့်ငါ့အား ခေါ်နေချိန်။ ။
အင်ဖရွန်ဆေးစက်
သွေးအနက်သည်
ပြေးလျက်စီးဆင်း
ငါ့လက်တွင်းသို့ စိမ့်ဝင်ချိန်။ ။
ဆေးအားပြင်းထန်
ငြင်းဆန်ဇီဝ
လွန်ဆွဲကြသော်
ဘဝထွက်ပေါက် ပျောက်ဆုံးပြီ။ ။
သွေးကြောထဲမှ
ခုန်ထအပ်ချွန်
တမလွန်သို့ လမ်းညွှန်ပြီ။ ။
ငါ့နှလုံးအိမ်
မြတင်းတိမ်သည်
ငြိမ်သက်ရပ်တန့်ပေတော့မည်။ ။
ကွေးကောက်အကြော
သေငယ်ဇောဖြင့်
မေ့မောမိန်မူး လူးလွန့်စဉ်။ ။
ငါ့မိခင်သည်
ရှိုက်ငင်ပူဆွေး
ငိုကြွေးခြုံးပွဲ ချလေပြီ။ ။
ငါ့ဇနီးကား
မျက်ရည်ကြားမှ
ငါ့အား နောက်ဆုံးကြည့်နေသည်။ ။
သမီးသားတို့
မျက်ရည်စို့လျက်
ငါ့လက်များကို နမ်းကြပြီ။ ။
သမားတော်က
သက်ပြင်းချ၍
ချွန်မြအပ်ဖျား
နုတ်ယူသွားသော်
ငါကား အသက်ပြန်ရှင်သည်။ ။
သေမင်းပခုံး
ငါခေါင်းအုံး၍
ရွှင်ပြုံးဝမ်းသာ
ပီတိဖြာစဉ်
မဟာသေမင်း
အမှောင်တွင်းသို့
ငိုရင်း ထွက်ပြေးပါလေသတည်း။ ။
(ကိုယ်တွေ့ ဝေဒနာ ခံစားရသော နေ့တနေ့သို့)
ဒေါင်းနွယ်ဆွေ
No comments:
Post a Comment